S’inscriver per la newsletter

La cartina #4

Tgenin è Voss pled preferì?

Charas amias e chars amis da la lingua rumantscha

«scalfin», «malgengli», «rinoceros» u «s-chalandrar». Quai èn pleds preferids or da la squadra dal DRG. Ma en il DRG dessi da scuvrir anc blers pleds – e franc era da quels pli captivants. Vegni perquai als …

Dis da las portas avertas

Venderdi e sonda, ils 4 e 5 da december, envidan la SRR e l’IDRG als dis da las portas avertas en l’Institut dal DRG a la Ringstrasse 34 a Cuira. Venderdi da las 15:00 fin las 20:00 e sonda da las 10:00 fin las 16:00 As mussain nus nossas fotografias e collecziuns … e sa chapescha ch’i dat era pleds e buccadas da piclar.

Venderdi a las 18:30 e sonda a las 14:00 preschentain nus il fascichel actual: «… e la morala da l’istorgia? – Igl è da morder vinavant fin al Z! – In’invista en il nov fascichel dal DRG cun ils pleds da ‘mor’ fin ‘mort’».

Nus ans legrain da Vossa visita. … e tgi sa? Forsa che Vus turnais a chasa cun novs pleds preferids!

Apropos bels pleds …

Co fissi cun «ualti» u «vieti»? En las Linguarias dad RTR dals 27 d’october ha Ursin Lutz, chauredactur dal DRG, dà in pèr exempels da pleds tudestgs ch’il rumantsch ha assimilà «vieti» bain.

tadlar l’emissiun

Las Annalas nr. 139 èn cumparidas

Rumantsch-tudestg-englais ubain tudestg-talian-englais? En tge successiun suondan las linguas en las annunzias da la Viafier retica? Co è la lavur redacziunala dal DRG sa midada en il decurs dal temp? Tge texts nunpublitgads chatt’ins en l’archiv da la poetessa Tresa Rüthers-Seeli? Questas ed autras dumondas èn ils temas da las Annalas actualas. Il duo redacziunal Barbara Cuffaro e Daniel Telli ha pudì preschentar a la vernissascha dals 22 d’october il nr. 139 da la retscha annuala scientifica da la SRR.

empustar las Annalas 139

In register online per chattar tut en las Annalas

Tschertgais Vus ils artitgels che Heinrich Schmid ha publitgà en las Annalas? Essas Vus a la tschertga da proverbis davart verms? Tschertgais Vus texts che s’occupeschan da «mitschafadias»? Lura è il register online da las Annalas in sustegn grondius. Accessibel è el qua: register.annalas.ch.

Anc n’è el betg cumplet, ils toms a partir dal 2009 vegnan anc categorisads. Ils artitgels chattads pudais Vus lura avrir e leger sur la pagina dad E-Periodica. … u sa chapescha er empustar las Annalas.

«Bimbam – bambin!» en il chalender d’advent

Davart «Ena cabena tufertè», «far hottaholla» e «pisar giutta»: Il chalender d’advent da l’IDRG da quest onn sa deditgescha a pleds e gieus d’uffants. Nus avain tschernì fotografias dad uffants or da la Fototeca dal DRG e las cumbinà cun versins e versets, gieus e spruchs che stattan en connex cun uffants, l’uffanza e forsa era cun in pau nostalgia. Guardar tut las fanestras pudais Vus sin nossas raits socialas ubain en il menu Fanestrinas da la pagina-web da l’IDRG.

Las fanestras d’advent vegnan medemamain publitgadas da la FMR en La Quotidiana e La Pagina da Surmeir.

La Societad Retorumantscha (SRR) è la pli veglia uniun rumantscha ed ella lavura vinavant per ina perscrutaziun persistenta da la lingua e cultura rumantscha.

Vulais era Vus far part da la SRR e survegnir regularmain infurmaziuns ed invits ad occurrenzas davart la lingua e cultura rumantscha?

commembranza