Dis da las portas avertas en l’IDRG

Vulais Vus savair dapli davart Voss pled preferì? Forsa en Voss dialect da Tschlin, Dalin u da Vrin? Tschertgais Vus ina fotografia da Castrisch dals onns 1920? Tschertgais Vus plans dad ina anteriura chasa a Samedan? Tschertgais Vus infurmaziuns davart in’isanza che Vus enconuschais be da Vossa nona da Scuol? Vulais Vus savair, tgi che la Societad Retorumantscha è e tge ch’ella fa? Na savais Vus betg propi co s’orientar en ils artitgels dal DRG e vulessas gugent in’introducziun?

Vegni venderdi e sonda, ils 4 e 5 da december als dis da las portas avertas. Nossas portas èn avertas: venderdi da las 15:00 fin las 20:00, sonda da las 10:00 fin las 16:00. Venderdi a las 18:30 e sonda a las 14:00 datti ina preschentaziun dal fascichel: «… e la morala da l’istorgia? – Igl è da morder vinavant fin al Z! – In’invista en il nov fascichel dal DRG cun ils pleds da «mor» fin «mort». … e forsa che Vus turnais cun novs pleds preferids a chasa.