DRG A–Z: Tge fa la redacziun?

Enconuschais Vus ils indices dal DRG? Quai è quest instrument nizzaivel a la fin da mintga tom. Il tom 15 dal DRG vegn plaunsieu terminà. Perquai èn las redacturas ed ils redacturs dal DRG mumentan – sper la redacziun – er occupads cun rediger ils indices. Quai vul dir che tut ils artitgels dal tom 15 vegnan examinads e nudads en tschertas categorias.

Per exempel noda insatgi tut ils pleds cun ils suffixs latins -ibile u -one ubain cun gieus da suns, insatgi registrescha en ina categoria tut ils pleds da derivanza betg clera, da derivanza franzosa u da derivanza tirolaisa. Insatgi intercurescha ils artitgels tenor las tematicas tractadas, p.ex. versins d’uffants, reglas da purs u dumondas da dretg u d’educaziun. Insatgi analisescha il svilup dals pleds: Tge pleds han spustà l’accent? Tge pleds datti be en il plural? E tge verbs datti be sco reflexiv?

Dai ina giada in cuc en ils indices e scuvri in ulteriur instrument dal DRG!