Invista
Il DRG documentescha e descriva l’entir stgazi da pleds dals idioms e dialects rumantschs. El explitgescha las significaziuns dals pleds, inditgescha lur pronunzia e mussa co ch’els vegnan duvrads en la lingua discurrida e scritta. Era betg mancar na dastgan modas da dir, proverbis, ligns, versets e bler auter pli. Mintga artitgel finescha cun explicaziuns davart la derivanza dal chavazzin. Il DRG sa basa sin il diever vivent da la lingua e sin funtaunas scrittas veglias e novas. Aschia daventa el in inventari cumplet da la lingua e cultura rumantscha.
La versiun stampada – sfegliar e sa fermar
Il DRG cumpara dapi il 1939 en furma da fascichels che vegnan unids periodicamain en in tom cun liadira da glin. En quests toms pon ins guardar suenter pleds e lur muntadas sco en in lexicon classic. La versiun stampada è adattada en spezial per studegiar artitgels pli lungs ubain tut simpel, sch’ins preferescha l’experientscha aptica al diever digital.
Tip: Bleras bibliotecas unversitaras e chantunalas disponan da la versiun stampada dal DRG.
La versiun online – tschertgar cun sistem e chattar svelt
Sin online.drg.ch è il DRG accessibel er online. Qua pon ins tschertgar pleds sistematicamain e svelt. La versiun digitala porscha funcziuns supplementaras, p.ex.:
- retschertga da text integrala sur tut ils toms
- raffinar la tschertga cun endatar il cumenzament u la finiziun dad in pled
- colliaziun als renviaments
- access direct a cuntegns che vegnan actualisads successivamain
Cussegls per l’utilisaziun:
- Savens basti dad endatar il tschep dal pled («cant») – il sistem propona variantas e furmas flectadas.
- I vala la paina dad endatar era scripziuns malsegiras – la tschertga resguarda differentas modas da scriver.
- Colliaziuns mainan directamain tar artitgels da chavazzins sinonims – ideal per sfegliar vinavant.
Ovra da consultaziun ed instrument da lavur
Il DRG è ovra da consultaziun ed instrument da lavur enina. El sa drizza tant a filolog:as sco er ad antropolog:as cultural:as e represchentant:as da differentas spartas da la perscrutaziun istorica sco p.ex. l’istorgia da cultura, da dretg u da medischina che pon sa servir dal ritg material original dal DRG. Ma era persunas laicas interessadas chattan infurmaziuns multifaras e nizzaivlas, p.ex. davart la significaziun ed il diever d’ina tscherta expressiun da lur vitg natal, davart la pronunzia dals pleds en las differentas regiuns ubain davart la derivanza d’in chavazzin.
