Reglament
Annalas da la Societad Retorumantscha
1. La Societad Retorumantscha (SRR) publitgescha contribuziuns linguisticas, litteraras, istoricas, folcloristicas e talas davart la cultura dal Grischun rumantsch en in senn pli vast en ses annuari, las Annalas da la Societad Retorumantscha (cf. art. 7 dals statuts da la SRR).
Las Annalas procuran per in barat scientific e rendan enconuschenta la SRR sco editura.
Las Annalas cumparan per ordinari mintg’onn.
2. La suprastanza elegia la redacziun da las Annalas. La cumposiziun da la redacziun duai tegnair quint dals differents idioms.
Las redacturas resp. ils redacturs vegnan elegid:as per 3 onns cun la pussaivladad da prolungar il temp d’uffizi.
3. La redacziun procura per il cuntegn da las Annalas e segirescha la qualitad scientifica, linguistica e formala da las contribuziuns. Ella po refusar contribuziuns inoltradas, sche quellas na correspundan betg a las premissas editorialas.
La redacziun dat il bun per stampa.
Las redacturas resp. ils redacturs survegnan in onurari annual adequat che vegn determinà da la suprastanza.
Las auturas ed ils auturs survegnan in’indemnisaziun per lur contribuziuns en las Annalas.
4. La redacziun da las Annalas collavura cun l’Institut dal Dicziunari Rumantsch Grischun (IDRG) e po quintar cun ses sustegn tenor il carnet da duairs.
5. Per dumondas da gener strategic consultescha la redacziun il presidi da la SRR che decida da maniera definitiva ni consultescha la suprastanza.
6. Quest reglament è vegnì approvà da la suprastanza da la SRR ed entra en vigur ils 13 da schaner 2026. El remplazza il reglament per las Annalas dal december 2016.
