La cartina #3
Avais Vus «bùn miers»?
Charas amias e chars amis da la lingua rumantscha
Avair «bùn miers» – quai tuna dad avair buns dents. Ma era la redacziun dal DRG ha in «bùn miers». Sche co?
Nov fascichel cun in «bùn miers»
La locuziun cumpara en il nov fascichel dal DRG, numnadamain sut il pled «mors I». Quel ha bleras significaziuns: ina morsa, ina furada, in tagl cun la fautsch, la dentadira, ina sort liongia, l’appetit, la beffa ed anc autras. Ina significaziun è era quella da la reussida, sco documentà per il sutsilvan «aver bùn miers». Quai vul dir ch’ins vegnia bain vinavant cun la lavur. Uschia pudain nus constatar: «La redacziun dal DRG ha buna morsa ed è avanzada fin a la mort cun ses pleds.»
Dapli davart ils pleds da «mor» sur «morala», «mordach», «morder», «morfium», «morin» fin «mort» pudais Vus leger en il nov fascichel 203/204 dal DRG. Quel è gia arrivà tar Vus a chasa, sche Vus al avais abunà. U che Vus al pudais empustar (ubain abunar) sur la butia da la SRR.
Leger en il DRG-online
Ils artitgels surnumnads n’èn betg anc en il DRG-online. Ma pertge betg cumenzar a leger ina giada il DRG davent dad A, p.ex. cun il pled «asen»? L’expressiun valladra «laschar tanter morsas» en il fascichel actual renviescha a quel pled. Ella sa referescha als tschofs-erva che restan suenter segar. A Müstair p.ex. vegnan quels numnads asens (DRG «asen», paragraf II, 8), per Surmiran e Sutsilvan èsi chauns, cf. artitgel «chan» (paragraf II, 2).
Cura è a fin il DRG?
Quai è ina da las dumondas las pli frequentas a l’IDRG. Sin la Pagina Rumantscha da la revista «Terra Grischuna» actuala preschenta l’IDRG talas dumondas – ed era las respostas.
Avais anc dapli dumondas? Lura nudai las datas …
… per ils Dis da las portas avertas
Era quest onn avran la SRR e l’IDRG las portas da l’institut. Tgi che ha interess da nossa lavur, vul guardar en la Fototeca, tschertgar pleds u tadlar in referat, duai nudar las datas da venderdi e sonda, ils 4 e 5 da december 2026.
… per la vernissascha da las Annalas
Las Annalas 139 cumparan quest atun. Ina part da la revista è deditgada a l’ovra da la poeta sursilvana Tresa Rüthers-Seeli. Data e lieu da la vernissascha n’èn anc betg clers. Restai al current sur nossa pagina-web, la pressa e las raits socialas.
Per ils fans e las amaturas da retschertgas en las Annalas datti quella saira dal reminent anc ina novitad allegraivla …
Tge fa la SRR?
Ils rapports annuals da la SRR documenteschan tge che ha muventà l’uniun en il decurs d’in onn: projects, svilups en l’Institut dal DRG, publicaziuns ed occurrenzas. Dals rapports annuals pudais Vus prender invista sin la pagina-web.
Sin la pagina da la SRR chattais Vus dal rest er ils statuts da l’uniun ed ils reglaments concernent l’IDRG, las Annalas e la Romanica Rætica.
La Societad Retorumantscha (SRR) è la pli veglia uniun rumantscha ed ella lavura vinavant per ina perscrutaziun persistenta da la lingua e cultura rumantscha.
Vulais era Vus far part da la SRR e survegnir regularmain infurmaziuns ed invits ad occurrenzas davart la lingua e cultura rumantscha?
